Fərid Qayıbov: Avropa Gimnastika İttifaqında hakimliyin müzakirə olunmasına çalışacağam
06 May 2015 12:02

thumb420_20150506125154864

Sportpress.az Azərbaycan Gimnastika Federasiyasının baş katibi, Avropa Gimnastika İttifaqının vitse-prezidenti Fərid Qayıbovun Minskdə keçirilən 31-ci Avropa çempionatının yekunlarıyla bağlı açıqlamasını təqdim edir. Federasiya rəsmisi nəticədən razı qaldığını bildirib:

“Azərbaycan gimnastları 2009-cu ildən etibarən ardıcıl olaraq bütün Avropa çempionatlarında medal qazanıb. Bu dəfə biz ardıcıl olaraq 7-ci qitə birinciliyində medala layiq görüldük. Sözsüz ki, gimnastikada ənənəvi olan favorit ölkələr var. Azərbaycan da həm qrup hərəkətləri üzrə, həm də fərdi mübarizədə mükafatlar uğrunda mübarizə aparmağa qadirdi. Minskdə göstərilən kompozisiyalar Azərbaycanda gimnastikanın inkişafda olduğunu göstərdi. Biz düzgün yoldayıq və bundan sonra da bu yolla davam edəcəyik”.

Qrup hərəkətləri üzrə yeniyetmələrdən ibarət yığma medala layiq ustalıq nümayiş etdirdi. Federasiya rəsmisinin fikrincə hakimlərin qiymətləri onları ilk üçlükdən kənarda qoydu: “Qızlarımız sözün əsl mənasında yaxşı çıxış etdilər. Çətin kompozisiya hamı tərəfindən alqışla qarşılandı. Sonda hakimlərin qiymətləndirməsi onları ilk üçlüyə daxil etmədi. Biz onların çıxışını yüksək qiymətləndiririk. Bu komanda qitədə ən yaxşılar sırasındadır”.

Avropa çempionatı gimnastımız Ayşən Bayramova üçün debütlə yadda qaldı. Gənc idmançımız ona bəslənən ümidləri doğrultdu: “Ayşən ilk dəfə belə mötəbər yarışda iştirak etdi. Yekunda 16-cı olsa belə bir sıra güclü həmkarlarını qabaqladı. Eyni zamanda Bayramova gələn il keçiriləcək qitə birinciliyində iştirak üçün vəsiqə əldə etdi. Ayşən kompozisiyanı uğurla yerinə yetirməklə rəqabətə hazır olduğunu nümayiş etdirdi. Marina Durunda son çıxışında bizi sevindirdi. Hakimlər onun çıxışını düzgün qiymətləndirməmişdi. Bizim etirazımızdan sonra çıxışa yenidən baxıldı və ona layiq olduğu xal verildi. Durundanın milli musiqi sədaları altında kompozisiyası bürünc medala layiq görüldü”.

Fərid Qayıbov yarış zamanı hakimlərin etdiyi səhvlərin Avropa Gimnastika İttifaqı tərəfindən araşdırılacağını da söylədi: “Avropa Gimnastika İttifaqında ənənəyə uyğun olaraq həm idman gimnastikası, həm də bədii gimnastika üzrə Avropa çempionatı təhlil olunacaq. Bu zaman hakimliyin müzakirə olunması gözlənilir. Ən azı bu məsələnin baxılmasını təklif edəcəm. Çünki, belə qiymətləndirmə davam edə bilməz”.

Avropa Oyunlarına gəlincə gimnastlarımız mötəbər yarışa hazırlığı davam etdirir. AGF-nin baş katibi artıq Avropa Oyunlarında iştirak edəcək idmançıların böyük ölçüdə məlum olduğunu dedi: “Qrup hərəkətləri üzrə yığmamız 6 gimnastdan ibarətdir. Heç bir problem olmasa onların heyətində dəyişiklik olmayacaq. Marina Durunda liderliyini qoruyur, ona görə əminliklə demək olar ki, Avropa Oyunlarında iştirak edəcək. İkinci gimnastın adı ayın sonunda dəqiqləşəcək. Ayşən Bayramova Avropa çempionatında özünü yaxşı tərəfdən göstərdi, eyni zamanda bizdə Gülsüm Şəfizadə var. Son qərarı baş məşqçi Mariana Vasileva verəcək”.

Azerisport

  • Share on Tumblr


Oxşar xəbərlər